Yolanda González Huergo

Yolanda González Huergo, el González vienme de mio pá, nacíu en La Felguera, y el Huergo de mio ma, de Siero. Como tanta xente naquel tiempu, mio padre y mio madre vinieron a buscase la vida a Xixón, onde nací yo en mayu de 1971.

Eché la infancia ente’l pobláu de Roces, onde taba y ta la casa mio padre y mio madre, -anque mio pá morrió mui mozu, va yá 20 años- y la casa de mio güelu y mio güela en Argüelles (Siero). Unos güelos que me marcaron muncho y a los que-yos debo una bona parte de lo que soi. Eses viviencies en Roces y Argüelles permitiéronme conocer dos maneres de ver la vida y ser mui consciente d’onde vien la mio familia y la mio xente, una esperiencia, la de tener un pie na ciudá y otru nel pueblu, que ye mui común ente la xente de la mio xeneración.

Asina, crecí nun barriu periféricu de la ciudá de Xixón de trabayadores del sector industrial que taba viviendo una reconversión montés. Un barriu qu’entá daquella taba arrodiáu de praos y onde los neños y neñes podíemos correr peles cais, delles ensin asfaltar. Al empar, pasé bien de tiempu tamién nuna aldea pequeña dedicada principalmente a la ganadería y l’agricultura onde tol mundu se conocía y onde tuve ocasión de deprender de primer mano lo dura que yera la vida nel campu. Caún de los dos sitios valió pa xugar, estudiar, conocer o, simplemente, tar.

Toi casada y, anque ensin fíos, tengo una familia cercana bien estensa que ye mui importante pa mi, empezando pol mio hermanu, col que caltengo una mui bona relación. Amás, tengo esa otra familia que ye una bona montonera de collacios y collacies que tamién faen rede y familia y con quien que comparto tol tiempu que puedo.

Creo que fui bona estudiante o, polo menos, eso dicíen les notes. Siempre se me dieron bien les asignatures de lletres y siempre se m’atravesaben les matemátiques, lo que descartó una bona parte de opciones a la hora de dedícame profesionalmente a según qué coses.

Anque de pequeña, como a tantes, llamábame l’aventura y quería ser arqueóloga, cuando acabé’l bachilleratu matriculéme en Drechu na Universidá d’Uviéu. Terminé la carrera ensin munches dificultaes y, ensin tener mui claro lo que quería facer cola mio vida, principié a preparar oposiciones. Creo qu’eses duldes veníen porque fueron años mui movíos no personal y nos que buscaba coses coles que definime, realizame y facer dalgo por esti mundu. Como consecuencia d’esto, naquel tiempu empecé a collaborar con Amnistía Internacional, organización na que participé activamente munchos años y de la que sigo siendo socia güei en día.

Tando tan presente como taba en mio casa la llingua asturiana, foi tamién una pasu natural entrar a militar nel movimiento de revindicación llingüística al ver, en directo y adulces, cómo se diba perdiendo dalgo que ye único nel mundu, el nuestru idioma. Poro, unos años depués, principio a participar activamente na Xunta Pola Defensa de la Llingua Asturiana.

Dalgo más tarde, a últimos de los 90, decidí dar un pasu más y entrar en política. N’Asturies yá yera evidente que tábemos allancaos na crisis permanente o, lo que ye peor, nun conformismu paralizante que, tengo pa min, tenía una bona base en nun creyer en sí mesma, en nun poner per delantre una idea d’Asturies que se sienta arguyosa de quién ye y del so sitiu nel mundu. Con esi convencimientu y esa preocupación entré n’Izquierda Asturiana (IAS) hasta llegar a Compromisu por Asturies, siempre nel marcu de lo que se vien conociendo como asturianismu políticu.

Dempues de unos cuantos años centrada na preparación d’oposiciones, nel añu 2004 conviértome en funcionaria de carrera del Conceyu de Siero. La práctica totalidá de la mio vida llaboral vien centrándose nel ámbitu del Urbanismu y actualmente soi xefa de Planeamientu Urbanísticu del Ayuntamientu de Siero.

Con too y con ello, préstame tamién alcordame de que primero trabayé como interina nel Ayuntamientu de Xixón en puestos diferentes, tanto de subalterna, como de técnica d’alministración xeneral.

Falo tres idiomas, asturianu, castellanu y inglés. Búsquense siempre güecos pa la llectura, una de les mios grandes aficiones que tien que competir col gustu por ver series y películes. Tamién tengo que reconocer una pequeña pero intensa relación reciente cola Play que permite despresurizar enforma.

Amás d’eso, pa disfrutar d’esa rede de collacies y collacios de la que falaba primero, préstame abondo compartir conversación, discusiones, bromes, platu y una botella de sidra nún d’esos locales de los que tenemos abondo nesta ciudá. Y el plan meyora entovía más si ye después de dalgún de los conciertos de les bandes que me presten, dende grupos locales como Herr Manos o Buen Suceso, hasta Felpeyu, Llan de Cubel o L-R, Dixebra y, cómo non, el mio queríu Manolo García.