Yolanda Huergo y Laura Tuero denuncien las les faltes nos equipamientos del club de La Calzada por cuenta la falta de previsión y caltenimientu
Yolanda Huergo, candidata a l’alcaldía de la coalición Podemos-Equo Xixón, y Laura Tuero, númberu dos de la candidatura de Xixón y responsable de Deportes en Podemos Asturies, visitaron apocayá les instalaciones de la Unión Deportiva Gijón Industrial, comprobando una vegada más les consecuencies de la falta de previsión y de caltenimientu nes instalaciones municipales.
“Los planes de construcción de los equipamientos deportivos tienen de realizase atendiendo a la racionalización de los recursos y l’usu pal que van destinaos”, afirma Yolanda Huergo. Unes premises que nun se tuvieron en cuenta va cuatro años na realización de los vestuarios de la pista polideportiva d’El Lloredal para l’usu del UD Xixón Industrial.
Tres estes obres, nes que s’invirtieron 180.000 euros, apaecen importantes defectos, como l’avería de la calefacción, que fixo que’l mugor y les goteres apaezan nos vestuarios: “Nun ye de recibu que cuatro años dempués d’una obra surdan esti tipu de problemes de los que naide se fai responsable, a pesar de les demandes que vien faciendo’l club”, denuncia Huergo.
No tocante a la pista polideportiva d’El Lloredal tamién se demanden actuaciones, yá que nes vigues del techu nun s’habilitó nengún mecanismu para tornar a les palombes, polo que la suciedá ye habitual na pista polos escrementos de les aves, nun llugar nel que xueguen neños y neñes y nel que s’atechen les families mientres se xueguen los partíos. “Cuando los y les neñes tán entrenando ta espuestos a esta suciedá, un problema que tien solución fácil y al que tampoco se-y dio respuesta”, cuenta Laura Tuero.
Otru defectu na pista polideportiva ye la falta de caltenimientu de los canalones, comíos pol pasu del tiempu, polo que l’agua cai directamente a la pista. “Trátase a cencielles de camudar unos canalones y afaer el techu, son cuestiones sencielles que yá tendríen de tar feches, según el zarru o la cobertoria de los llaterales para protexer del fríu, l’agua y el vientu”, señala’l númberu dos de Podemos-Equo Xixón.
D’otra manera, nel campu de yerba sintético de Santa Cruz, hai un fondu nel que nun se punxo la valla de perímetru nin s’asfaltó para cuntar con un campu en condiciones.” Unes 400 families, unes 3.000 o 4.000 persones, beneficiense de l’actividá del UD Gijón Industrial nun barriu fabril con muncha xente que tira por caltener vivu un equipu y una actividá que contribúi a la cohesión y la dinamización de la comunidá”, remarca Laura Tuero.
“Trátase d’un club con un calter social, mui enraigonáu nel barriu y con un valor social fundamental, polo que lo mínimo ye realizar les actuaciones precises para cuntar con unes instalaciones amañoses”, sigue la candidata a l’alcaldía del Conceyu de Xixón.