La llista, encabezada por Yolanda Huergo, suma distintos perfiles profesionales con muncho qu’apurrir a Xixón y cuenta col respaldu del sociólogu y filósofu César Rendueles
“Una candidatura formada por persones con perfiles profesionales bien distintos, con muncho qu’aportar a esta ciudá y que va poner tol so trabayu pa facer realidá’l cambéu que Xixón precisa”. Con estes palabres define Yolanda Huergo a la candidatura de la coalición Podemos-Equo Xixón de la que la llicenciada en Derechu y especialista n’urbanismu dende’l so trabayu na alministración local ye númberu unu. La candidatura presentábase esti martes 23 d’abril nel Muséu del Ferrocarril de Xixón. “Si daqué demuestra la hestoria recién de Xixón ye que se precisa un cambiu d’actitúes, de polítiques y de cares y esta candidatura representa ese cambiu”, sigue la candidata a l’alcaldía del Conceyu.
Dende Podemos-Equo Xixón vese claro que “yá valió d’inmovilismu y de conformismu. Si queremos convertir esta ciudá no que queremos precísense persones como nós nes instituciones”, señala Huergo.
Una candidatura que naz amás del convencimiento de que fai falta sumar y por eso nella ta la representación de Podemos y Alternativa Verde por Xixón-Equo. D’esti postreru partíu, ocupa’l númberu 5 na llista Rufino Fernández: “Dende Equo consideramos que’l trabayu dientro de les instituciones ye imprescindible para defender el mediu ambiente y la salú; trabayar por un urbanismu y movilidá sostenibles dende la tresparencia; favorecer la participación ciudadana y esixir midíes concretes contra la contaminación que sufrimos. Consideramos que, nesti momentu, cuando’l cambéu climáticu ye una realidá que naide puede cuestionar y tán atacándose llogros qu se conquistáronse a lo llargo de muhcyos dende’l ecofeminismu, fai falta sumar pa evitar una reversión de les llibertaes algamaes y un mayor deterioru de los bienes y servicios públicos”.
D’otra manera, la llista de Podemos-Equo Xixón ciárrala’l sociólogu y filósofu César Rendueles, “un de los meyores analistes de la nuesa sociedá, siempre dende una perspectiva tresformadora, col oxetivu puestu na llucha contra les inxusticies y con un compromisu calteníu a lo llargo de los años con Asturies y Xixón”, remarca Yolanda Huergo.
Rendueles treslladó’l sofitu a la candidatura y esplicó que forma parte de la mesma “porque creo qu’esta ciudá merezse’l cambéu políticu que’l proyectu encabezáu por Yolanda Huergo puede impulsar. Xixón tien falta d’un Conceyu valiente que s’atreva a poner en marcha polítiques sociales y medioambientales ambicioses, al altor de los problemes a los qu’enfrentamos. Precisamos un Conceyu que sea a encarar los problemes de contaminación, vivienda, tresporte, desigualdá y degradación de los servicios públicos ensin axendes ocultes nin llealtaes a les élites económiques. Un Conceyu, a la fin, que faiga de Xixón una ciudá más democrática, igualitaria y viva”.