Huergo: “Esti programa y esta candidatura son la única vía posible pa que en mayu tengamos un Gobiernu de progresu en Xixón”
Podemos-Equo Xixón presentó’l so programa electoral, un documentu ellaboráu participativamente y en diálogu con diversos colectivos: “Son 417 midíes que tamos convencíes de que van dar una forma nueva d’atalantar la xestión de la economía, la política social, la cultura y el mediu ambiente nesta ciudá. Un programa que nos trai a onde tenemos que tar, al sieglu XXI”, indicó Yolanda Huergo, candidata a l’alcaldía de la coalición.
Un programa y una candidatura “que son la única vía posible pa garantizar que nel mes de mayu tengamos un Gobiernu de progresu en Xixón”, siguió’l númberu unu de Podemos-Equo Xixón. “El tiempu del inmovilismu y el paralís terminó, terminaron los años de inacción del equipu de Moriyón. Somos la única garantía de qu’haya un gobiernu del cambéu en Xixón y que sía un gobiernu qu’actúe dende la xusticia social”, amestó Huergo.
Eduardo Campumanes, coportavoz d’Alternativa Verde Por Asturies-Equo, espresó la so allegría “por compartir esta candidatura del cambéu, la candidatura que se precisaba para tresformar esta ciudá”. L’integrante de Equo recalcó que se trata “d’una candidatura del cambéu, feminista y encabezada por trés muyeres, ecoloxista pa encarar el grave problema de contaminación que sufrimos y el frutu d’un procesu unitariu y qu’agora se presenta col programa que Xixón precisa pa tresformase”.
Dende Equo Xixón, tamién se recalcó la consonancia ente los programes de dambes organizaciones que dexó crear l’actual documentu de manera consensuada: “Nun tuvimos qu’apautar en nenguna diverxencia, yá que ye un programa realizáu collaborativamente, con bona voluntá y arrogancia, que dexó llegar a esti programa común que nos toma a toos y toes”. Nesti sentíu, Campomanes aludió a la bona sintonía y bon faer de los y les compañeres de Podemos Xixón pa llegar a un documentu que nos satisfai a a toes y a toos”.